Poesie Siciliane

DRAGO CALOGERO DRAGO CALOGERO Pubblicata il 21/10/2010

L`omu


Diu lu fici cu lu cchiù granni amuri
‘mpastannu crita cu tutti i deci ita.
Comu a iddu si l’immagginava,
mentri ‘nta lu naso forti ci sciusciava.

Certu, l’impegnu tuttu ci lu misi,
ma ‘nta la prescia ‘mprugghià occhi cosa.
E puru si tempu nun ci nn’ammancava
a rimpastallu cchiù nun si la ‘ntisi.

“Accussì lu lassu! ” si dissi ‘nta la menti,
e pi rimediari s’ammintò lu pumu e lu serpenti.
E puru la fimmina ci vosi criari,
“Accussì nun t’ ammanca tiempu pi putiri trivuliari”.

E a ccù c’addumannava comu avia vinutu
isava li spaddi e ss’arristava mutu.
E a so figghiu Turi, ca ‘nterra avia a mannari
accussì ci descrivia chist’Omu da salvari:

“L’omu è comu un fogghiu di giornali, avi du facci pi farisi capiri.
E’ comu li pali di li ficurini, ca ti parinu lisci, e pua su chini di spini.
L’omu è comu nu panaru, ca è chinu di buchi, ma a tia ti pari sanu.

Avi l’occhi ca l’aiutanu a taliari, l’aricchi ci l’avi pi sintìri,
la ucca ci servi pi parrari, la testa pi putiri ragiunari.
Li vrazza su pi travagghiari, li jammi pi curriri e satari,
li peri pi putiri caminari.

L’occhi ci l’avi, ma camina a tantiari
e pi sintiri a l’aricchi c’ha gridari.
La ucca nun la grapi, picchì nun pò sciatari
e li vrazza nun li isa mancu pi mangiari.

Li jammi nun ci servunu, la machina usa pi passiari.
E la testa? Ma quali ragiunari…giudiziu nenti nn’avi
si jucà puru l’aria c’avissi a respirari.



L’omu è comu n’acieddu d’intra la jargia,
avi l’acqua, lu risu, lu pani. Iu, ci penzu pi fallu mangiari!
Eppuru ‘un si ci cridi è sempri cchiù accanitu
ad arrunchiari robba sfasciannu puru lu creatu

Ma dicu, chi si nni fa? A chi cì servi a fari
si unnè patruni mancu di campari?”
……………………….
…………………….

“Patretè, scusate, però chi fissariata……
pi lagnusia facistivu sta sorti di frittata!!
Si lu tempu nun vi mancava e la crita era regalata
chi ci vulia a rifalla na ‘mpastata?”


Poesia seconda classificata nel concorso di poesia dialettale indetta dal comune di Alia(PA) nell`anno 2008


Letture 2428 - Commenti 0
Pubblica le tue poesie
Vuoi pubblicare le tue poesie?
Inviacele al seguente indirizzo di posta elettronica : assarca2001@gmail.com