A Giuseppina Marchiafava e Maria Rosaria Sgarlata,
che non conosco e a cui nulla mi lega
se non, forse, quel comune rivolo dal sapor salato,
che affiora ogni qual volta Il pensiero vola là,
tra luoghi e volti di un tempo ormai passato.

Pua vaiu pi taliari
cu scrissi ‘nto frattiempu,
di la Scozia ancora nuddu
da Baton ‘u gnu Vicienzu.

Abbassu la schermata….
“mmiiiii! Lu master cca è siddiatu
di la Germania scrissiru
pi ccù hannu vutatu”.

E chistu ‘un si pò fari!
‘U nnè ‘na cosa bella,
puru si a mia pari
u segretu di puddicinella.

Continuo lu me giru,
ccà e ddà vaiu a taliari
vidiemu nni sti iorna
cu si fici fotografari.

“Talè sta picciridda!
Talia quantu è bedda,
chi paru d’uocchi avi,
tutta so nanna Minichedda.

E chistu? Chistu cu è?
Cumpari Sarafinu?!
All’autri ‘un li canusciu
però chiddu è so figghiu Pinu”.

Continuo a digitari
ancora cu gran lena,
sarà puru virtuale
ma pi mia vali la pena.

È quasi menzzuiornu
e già mi sientu stancu,
’u nnè facili stù curriri
di l’acqualonga finu a ‘u campu

passannu di la Pernici
e tuttu u Rabbatieddu,
scinniennu di la chiazza
finu a lu cannulieddu.

E ddà ora m’assiettu
lu sacciu: « virtualmente! »
E tornu arria carusu
ammienzu a la me genti.

Astutu lu compiuter,
pi oi finì accussì.
E s’ haiu vogghia di sunnari
ridigitu “Assarca puntu ittì”.

(Calogero Drago)