C‘era ‘na vota nta un logu di Madonii,
‘na festa pirmanenti di l’aceddi.
‘A lu spuntari du suli nta muntagna,
niscìanu a una a una li ciauli di li rocci
e vulavanu - prima attornu e poi luntanu -
pu’ celu azzurru e splendenti da campagna.

Vidìanu la genti ‘ntenta a travagghiari,
anticchia stanca – si - ma cuntenta di fari!
Li cosi nte famigghi ìanu boni
e nto pajsi c’era l’unità:
si passiava, si chiacchiarava, si ridìa,
ci si sintìa ricchi anche senza tanta proprietà.

Supra lu scjumi di Gazzara, tra li du massi bianchi da muntagna,
dunn’eranu li mulini ad acqua cu’ i sacchi di frumentu a macinari,
tra li cirasi, i ficu e ficudinni, la racina, i pruna, li pira e i mennuli d’atturrari,
li ciauli vultiggiavanu felici, e cu ddu cantu - assìami a li jaddini, cunigghia, maiali, gatti e cani
rallegravanu lu cori di la genti: - “ciau… ciau… ciau..!” -
parìa ca dicissiru, ed era ‘na festa davveru singolari!

Poi vinniru nta la società - a pocu a pocu - tanti novità,
in nomu du progressu - si, va beni! - ma c’ammazzarunu tanti cosi beddi!
Mariti e mogghi cuminciàrunu a starisi lassati;
li figghi, un po’ sbandati, pirdìanu l’amuri di li cosi;
si vulìa, si pretinnìa sempri cchiù, pi cumpinsari i beni suttirrati,
e ‘a fatica du travagghiu pisava comu ‘nu macignu!

Si misiru da parti li cavaddi,
cu li machini tuttu divintò cchiù comudu,
ma cu tempu ‘u cielu …s’affumò!
Nta li campagni abbannunati i pasculi patìanu.
L’oru di lu granu e li jardina
un panorama sculuritu tuttu quantu furmò!

Quann’arriva la matìna, lu suli, ‘ncampagna, nun surridi cchiù,
ca li ciauli, cu passàri dill’anni, furunu pigghiati di tristezza!
…Però, quannu vaju a truvari dda vicinu - ‘o cimiteru - me patri e me matri,
e ricordu l’amuri ca sempri mi davanu,
pensu ca - io puru - ‘ddamuri lu dugnu a me muggheri e ‘e me figghi,
perciò mi sentu giovani e felici …comu quannu li ciauli cantavanu!

Piero da Caltavuturo

Li “ciauli” (le “ciaole”) sono degli uccelli, la cui specie è in via di estinzione. Essi vivono ancora in qualche località montana della Sicilia, fra cui Gazzara, sita nel territorio di Caltavuturo, nelle Madonie. Hanno le piume dal colore scuro ed il becco giallastro; sono di grandezza e di aspetto molto simile alle rondini; amano volare in aperta campagna, da soli o a gruppi di non più di sei o sette, cibandosi di vermi che trovano fra le rocce della montagna, dove sono soliti nidificare, e di frutta che beccano qua e la dagli alberi. Volteggiando alti nel cielo, emettono il loro tipico verso che suona come un ”ciao!” gioioso, da cui deriva la loro denominazione “ciauli”, ma ripetuto talmente tanto da formare una …gazzarra, donde la denominazione della località “Gazzara”.
L’autore, con questo componimento, scritto nel luglio 2003, vuole rappresentare come l’amore che diamo e l’amore che riceviamo abbiano la capacità di rinnovare ogni cosa, superando l’aridità di valori umani e la desolazione che la società ed il progresso spesso portano con se.