Ai miei cugini, a me infinitamente cari,
a loro che hanno avuto il privilegio
di conoscere e di essere stati cullati
dalle braccia di….

ME NONNA LILLIA
Me nonna Lillìa
turnava di la Valatazza
idda d’avanti e arrinava la mula
ca vardedda, ‘na trarenta e la visazza.

Era già tardu
lu suli quasi si nni iava
e iunta a li chiantiteddi
s’addumanava:

“Si pigghiu di sutta alluangu
e fazzu tardu.
Mentri d’incapu m’impressiona
‘u Campusantu….

.….nenti ora accurzu.
Pigghiu di li Santuzzi
e passu a salutari
li me parintuzzi”.

Intanto lu suli
ancora calava
e da pizzu Busambra
l’Alia salutava.

Iunta a lu cancellu
di lu sacru luocu
lu scuru avia calatu
lu cielu era tuttu un fuocu

e puru si appi
un dubbiu pi n’istanti,
‘un si la ‘ntisi
di passari avanti.

“Già ca ci sugnu –
si dissi ‘nta la menti –
dicu n’Avi Maria
a tutti i me parenti”.

S’addinucchiau, si misi a priari,
quannu…………
ppppssssssssss
a li spaddi s’intisi chiamari.

“O matri o matri bedda sapi cu è?”
Si susi, talia ‘ntunnu,
si torna addinucchiari
“Sicuru qualcunu c’avi vogghia di babbiari”.

S’appoia a lu cancellu,
ricumincia a priari
e arriari …..ppppssssssssssssss
natru fischiu ‘ntisi arrivari.

Si risusi, si ritalia ‘ntunnu,
ritorna a ritaliari
c’era sulu la mula
ca continuava a muschiari.

“Armuzzi du Priatuariu,
Armuzzi Santi
facitimi curaggiu
guardatimi li spaddi”

Afferra la riatina
si metti i piari a via
quannu……. ppppssssssssssss
a li spaddi ‘ntisi fischiari arria,

Allonga cu lu passu
lu mulu fa truttiari
ppssss…pppsssss…pppsssssss
ma li fischi d’arrietu
continuanu a aumentari

“Oh Purgatoriu Santu…..
oh matri mia Sant’Anna
picchì a mia sta Cruci
picchìì sta cunnanna”.

E mentri chi priava
ci vinni puru un dubbiu
“sapi si su vivi
o su di l’autru munnu?”

“Ora m’armu di curaggiu
e fazzu na pazzia
e si su vivi scippanu
si no, nun mi chiamu cchiù Lillìa”

Curri pi la vardedda,
afferra la trarenta
la stringi ‘nta li manu
s’abbassa e mentri attenta.

pppsssss……..
ppppssssss…….
pppppsssssss…….
lu scrusciu ancora aumenta!

Allura allonga u cuoddu
cu l’uocchi a pampinedda
s’appoia a la visazza e…..
pppppsssssss “oh Maria bedda!!!”

E jetta na gran vuci
cu tuttu lu so sciatu
“oh matri li linticchi
pa’ strata aiu siminatu”

(Calogero DRAGO)