Chistu è ‘u Paisi du’ suli…

O cara Italia, terra di vitieddi,

cratuli, zammatara e ciaravieddi,

duoppu un gran battagghiari pi’ li strati

dintra li bagghi e nna li vaneddi

contru la latina lingua-matri,

matri comuni di tutti li genti

chi sunnu cu du’ pieri nna un Stivali

e Corsica e Sardegna e Trinacria,

unni la primavera è tuttu l’annu,

cuomu Maruni diri si cumpiàci,

di Virgiliu Maruni staiu parrannu,

unni lu sacru fonti di vattìsimu

di zuccuna cristiani nni fici

cu li paroli: Ego te baptizo…,

ca li capisci puru un picciriddu;

unni risona la duci parrata

chi ti ‘mpararu to’ patri e to’ matri,

accussì simigghianti a lu latinu

ca pi’ latina via ritta s’intendi

e si cci à diri: Musca! a lu Rumanu,

nun à bisuognu di vocabbolariu,

e declamannu Dimmi, dimmi, apuzza…,

cu la bacchetta, pronta pi’ l’usu,

la parti di zìrbia chi nni appartinìa

pi’ matematica nni la dividìa

lu giustu prufissuri Macalusu,

Tizziu, Caiu, Filanu e Martinu

‘ntùppanu la ucca a Burrascuni,

cuomu lu chiama Turiddu Di Natali,

cu dda truvata di la par condicio,

ca lu puopulu ‘ntendi, cum iudicio:

Mi vuogghiu mettiri a pari cu Tizziu,

pi’ ghìnchimi li taschi cuomu a issu...,

cu lu bieddu pronomu indicativu

ca si usava nna li du’ Sicili

e ancora l’usa Lu Napulitanu…

Lu bieddu issu chi nni etta ‘nfacci,

Vicienzu Marchiafàva, quannu veni

di la città di lu mari e lu suli

e di miliuna di canti d’amuri,

unni, ‘n divisa di polizziuottu,

provvistu di cascu e manganellu,

curri darrietu a scugnizzi e monelli,

ormai cu nnu pocu di suprasciatu,

duoppu tantu nobbilissimu servizziu.


Didacus

titolo originale ”Par Condicio...” in ("Dialogo", periodico formativo cristiano - Condirettori: Rosolino La Mendola, Adriana Iovino - Sant'Anna, Alia – anni '80 / '90)