Barrel Vault SurreAlia Undergrounds
Ora ca è imminenti l’equinozziu,
l’avruchedda, sciuruta, nna li fuossi,
e a li ficu cci cula lu zuccaru,
ficu d’asciucari e ficarazzi,
l’Alisi, àvi pronta, la utti,
di rovere, rèsina, castagnu
nna lu puostu, chi sì’ po’’, cchiù scògnitu,
latitudine, x, longitudine, y…
Pronti àvi tutti l’ingredienti,
pi fari un vinu cuottu d’eccellenza:
muscatiddara, cutugna, miscugghi,
scorci d’aranci e carrubbi, fragranti,
e pensa puru ca si mustu abbunna,
oltri la capienza di la utti,
un po’ di mustardi, si stampa e ‘nfurna,
di lu front-room, nna lu furnu…
A Londra, Parigi, Shanghai,
trasiènnusi, lu sceccu, pi la cura,
va, a li mircati, generali,
pi un po’di cesti di racina giusta,
di li chianti rumani, àpuli e tusci…
Tubes, undergrounds, metrò,
Camden, Les Halles, Ballaro,
King’s Cross, Santu Pancraziu,
Gare du Nord, Gare de Lyon,
Tunnel of Manica, Euro Express,
all’occorrenza, sù’ mobilitati…
E ti fa’ vinu cuomu Ddiu cumanna,
e, mali c’àvi a gghiri, vinegar...
Didacus
