NATALI LUNTANI DI L'ULTIMU MILLENNIU

Nni 'na sirata di sta longa estati
ca a chidda di lu Santu si jungi
ca quannu a Lalia arriva, a cavaddu,
lu pajsanu lu vinu sprunedda
e a viviri ci duna ni la bàccara,
stava pinzannu a quantu dici 'u muottu
di la citati di Montimajuri:
"Duopu li Muorti la nivi arrietu i puorti..,"
ca d'un cristianu mi vitti scumpunutu,
chi 'un canuscìu, ma notu mi parsi
cuomu na facci di luna, 'n'austu...

"Ia sugnu Pinu, figghiu di Libbuoriu,
avìamu casa arrietu a la Matrici,
ALIGN=JUSTIFY>
nun po' pinzari di nun ricurdari,
pi' via di lu mistieri di me' patri,
ora appannaggiu di la Parmalàt
e d'autri zammatàra nazzionali...

Ma lu nostro prodottu era speciali,
picchì latti di crapa canusciuta,
sterilizzatu cu' la tramuntana,
c'ammansava batteri e cristiani,
prima di la scoperta di Pasteur,
e si purtava puru a domiciliu,

cuomu lu pàrracu, corpus Dòmini...

Di Savona, unni sugnu da tant'anni,
si vaju a Marsiglia, passannu li confini,
pi' squisiti motivi culturali,
accattu Roquefort e Camembert,

di vacca lu primu, di piécura, l'autru,
ma pi' un semplici sfizziu sciovinisticu,
accattu puru lu caciu di crapa..."

"O caro Pinu. a tìa nun canùsciu?! ...
Tu si' l'idolu di la me' prima etàti!...

Ti ricordi, d'arrietu a la Matrici,
ca, tu, ammastratu a tirari a li crapi,
o a l'aciddazzi di Cuozzu di cuorvu,
puru eri bravu a tirari ciacuddi,

in verticali, supra la Matrici?!...

Quannu lu Natali era a li porti,
sbirsavamu p'arrietua la Matrici,
a fari crita, cuomu stazzunara,
pi' pupi e armaluzzi di Presepiu...

C'eranu allura ni la cumpagnia
di l'artisti c'avìanu ad operari
figghi di masci e figghi di burgìsi,
carusi, c'ora sunnu uomini " illustri" !...

"Cuomu. nun mi ricuordu, caru Chinu,
cuomu lu chinu di li vurciddata,
chi si tiravanu puru a li ziti,
a la Matrici, ni la Notti Santa?!...

Lassava li crapi supra lu cuozzu
pi' vìriri nasciri lu Bamminu
e pùa dari na manu a fari fuocu,

na lu chianu di la Chiesa cu' l'amici,
cuomu lu vuschieri avanti a la Grutta:
"Autru nun aju, o Divinu nutricu,
ia fazzu bieddu fuocu e v'arrichìu,
cu' sti du' manni di ligna di ficu!..."

'na li luonghi cunti di lì nanniculi,
c'attuornu ni tinìanu a la brascera,
e, cu' ddi cari manu rinsiccuti,
accarizzàvanu paroli santi..."

di Didacus

pubblicato in " La VOCE della Mamma " di Alia, nr.4/99, pag.3