SICILIA

Radici & Civiltà

FERRARA SASA` FERRARA SASA` Pubblicato il 20/11/2010
<b>SICILIA</b>

SICILIA

Sicilia bedda mia, terra d'amuri!
Si fussi n'pueta di granni valuri,
trovassi certu li paroli adatti
e no sti versi scarsi e malufatti,
pi diri ca ti vogghiu tantu beni
e quannu tu mi manchi soffro peni.
Ma sennu scarsu, chi ci pozzu fari?
Ti cantu cu la vuci di lu cori.

Si comu na gran fimmina biata,
‘nta l'acqua di tri mari stinnicchiata:
hai misu di traversu pi cappeddu,
lu gran Vulcanu di lu Mungibeddu;
ti fannu di curuna e di decoru,
limuna e aranci di la Conca d' oru:
lu Suli ti fa lustru e ti quadìa,
lu Mari t'arrifrisca e t'arricrìa.


Cantu l'aceddi, l'arvuli, li sciuri,
li rari frutti e di bonu sapuri,
li vigni cu li rappi a pinnuluna.
Lu vinu bonu ca fama ti duna,
lu celu azzurru, l'aria profumata
ca cchiù bedda ti fannu e disiata;
la zagara, li mennuli gustusi;
li to' abitanti boni e laboriusi,
li to' figghi luntani a la stranìa
e cu è luntanu e tantu ti disìa.

Ca sugnu figghiu to', nni portu vantu,
si viu cu ti fa mali, soffro tantu;
e puru si la vita tiru a stentu
sulu vicinu a tia sugnu cuntentu.
Sicilia bedda mia! Iu t'amu tantu!
Ti pensu, scrivu, e mentri scrivu cantu!

Maggio 1985

Sasà Ferrara
_______________________

versi già pubblicati nel periodico La VOCE di Alia, nr.3/99, pag.4, tratti dalla raccolta postuma in dialetto siciliano “La cannila e lu cirinu” (1998)


Viste 10815 - Commenti 0
Iscriviti
ed inizia a pubblicare i tuoi contributi culturali