PIZZU DI CUORVU SWEET JOB
Spring, summer, winter and fall… Demis Roussos
Pizzu di cuorvu, pizzuta d’Avola
miennula cavalera, titolata,
e, ciononostanti, tantu amata…
Miennula tunna, cuomu nucidda,
o di grannizza e forma d’agghianna
e lu sapuri di la fastuca,
a Raggiura, a Li Timpi, a Li Listi,
a La Intera, a Quattro Porti,
‘un c’è puostu di Lalia ca ‘un li porta,
a facci di suli o a tramuntana...
Nni ‘na chiusa, a la via pi la Surfara
cci aiu ‘un peri di miennula amara,
c’amari si fà pi’ l’amaretta,
dovutu contrappuntu a la dolcezza
di turruni, scattata e cubàita,
nna li trattamenta e tavulati…
Matrimoni e dignitati, su’ ditti
di li Cieli calati, a li vocati,
e, nna lu mentri, di ‘na passata,
di un trattamientu, di ziti, a l’antica
di li Cieli calàu, ‘na ‘nguantirata,
pi la foga di du’ scanazzati,
lu pastizzuottu, nni l’accaparràrisi…
Di li cieli, calavano, a l’amati,
la Notti di Natali, urciddata,
mentri l’organu, era, a lu Gloria
e lu carusu, tirava, li màntaci,
pi’ ‘na lira o du’ liri d’allura…
Cuomu si fà, a tastari, ‘na miennula
o cosa duci chi nni derivassi,
nni la vasta gamma di prodotti,
senza associàrivi li nostri muorti?!...
Lu zzi Geniu, cutulava, li miènnuli
cu l’ausiliu di masculi e fìmmini:
scucchiulava, asciucava, commerciava,
e, a tavula, lu scacciu, nun mancava,
né, nna li festi, la minnulata
miennuli caliati, nna lu furnu,
cubaita, gelatu di campagna,
scattati, amaretti, glassati
piecuri strippi, latti di mandorla,
grazzi a li nanni, ziani e cuscini,
chi, nn’elergivanu, gioi divini…
Oh lu sapuri di li passuluna,
o miennuli, caliati, di lu suli,
cu lu companaticu di pani!..
Chi picuruni, nni facìa, Maria,
ca era, un priuri, quannu niscìa,
di lu stampu di gessu, Gesù mia,
e un miraculu, parsu, n’avissi,
si la fattura, ura pi ura,
cu granni passioni, vistu, ‘un avìssimu,
di lu zeru ontologicu a lu partu:
la briusa scacciata, in cucina,
la sbollentata e la munnata,
la macinata e la ‘nzuccherata,
la grassa, gulusa, ‘mpasta-artigianale'>pastata,
ca mancu, ‘un picuraru, li so’ piecuri…
E nun vi dicu, di la batterìa
du grand ensemble, di Donna Nina,
coinvolgenti, mienzu paisi,
picchì, parru, di piccoli imprisi…
Didacus
FLASH BACK