Ugdulena-Porta Erculea Tymon
Di l’Ugdulena a Porta Erculea,
pi lu Tribbunali arrizzulannuni,
Via Porta Erculea, Via di li putieddi,
don Ciddu, Faranna, Malatì,
Piazza Bagni, Hotel delle Terme,
Puniche, Elleniche, Romane,
Bizantine, Arabo-Normanne,
lu Lungomare, l’anticu puortu…
Si lu timuni era solitariu,
cavavi di li taschi, amu e lenza
e senza canna e cu esca d’accattu,
cu granni meravigghia di l’astanti,
beccavi uggiuna e manciafranchi…
Si lu timuni era d’équipe,
e nni la squadra iucava Micheli,
cumpagnu di bancu, fenomenali,
figghiu di Teti e di Peleo,
cu acqua di mari nni li carini,
si concretizzava la metafora,
la sineddoche barca addivintava,
una nni pigghiava di la rada
e nni imbarcava pi ‘na varchiata,
nna lu Tirrenu, a forza di remi,
e avìa lu sciatu puru pi gridari…
