L`insonnia

Radici & Civiltà

TODARO GIOACCHINO TODARO GIOACCHINO Pubblicato il 22/03/2018
L`insonnia
L’eventuale pubblicazione di parziali brani musicali allegati a testi scritti è fatta a titolo di Demo, essendo essa finalizzata a documentare la relativa ricerca della rubrica “Radici & civiltà” non avente scopo di lucro, ma, piuttosto, finalità di libera divulgazione culturale.

L`insonnia

Quannu la notti l’occhiu nun ha paci,
la menti vola a ccomu pari ad idda
e li ricordi fannu tanta fudda:
comu lu sciumi a’ la so’ stritta foci.

S’ammuttanu cu’ forza, a fari scuma,
pì nnesciri tra d’iddi fannu a gara,
ma sulu li cchiù forti vennu fora
chiddi ca mai lu tempu nu’ cunsuma.

Lu tradimentu di lu megghiu amicu,
quantu di cchiù è orba la to’ vita,
l’aviri persu la to’ giusta strata
o lu rimpiantu di lu natìu locu.

Lu scuru tuttu chistu l’ingiganta;
comu l’ummira a scinniri lu suli,
ca fa’ cchiù granni chiddu ch’è nurmali,
finu a quannu la testa cchiù nu’ cunta.

Ad iddi lu to’ corpu l’accumpagna,
pari ca fussi su li spini misu;
si gira sempri comu fussi un fusu
e lu suduri la to’ frunti bagna.

Nun sulu iddi sunnu a farti mali,
quantu li vrami di li gatti fora
o li rintocchi ad ogni quartu d’ura
di l’orologiu di lu campanili.

La tussi forti pì lu raffridduri
e lu runfari d’inquilini accantu
e la cassetta di lu bagnu sentu,
a cuntu fattu, a menu di triuri.

Chianci pì fami ‘n’ annunnatu ‘nfasci
e tostu si scatina ‘n tirrimotu:
di vucilii, di passu cuncitatu,
di naca e nenia pì quantu s’addurmisci.

E fazzu l’arba sempri cu’ stu ‘nfernu,
quannu tra stenti m’addurmisciu stancu.
L’amata moglie, ca mi dormi a’ sciancu,
mi chiama … dicennumi ch’è già jornu.

Possibili ca mi succedi chistu
quannu lu sensu miu nun è sirenu
ed ogni cosa pari senza frenu:
pì darici all’insonnia ancor cchiù gustu!


di Gioacchino Todaro


Viste 7905 - Commenti 0
Iscriviti
ed inizia a pubblicare i tuoi contributi culturali