Era n`atru maggiu...!

Radici & Civiltà

TODARO GIOACCHINO TODARO GIOACCHINO Pubblicato il 13/04/2018
Era n`atru maggiu...!
L’eventuale pubblicazione di parziali brani musicali allegati a testi scritti è fatta a titolo di Demo, essendo essa finalizzata a documentare la relativa ricerca della rubrica “Radici & civiltà” non avente scopo di lucro, ma, piuttosto, finalità di libera divulgazione culturale.

Era n`atru maggiu...!

Era di maggiu…, ricordu lu misi:
sciurianu, macari,  pira a la chiusa,
e la salutari marva cu la rosa;
ma tannu…, la vita era ‘n’ atra cosa!.

Li sciuri eranu  pì lu duci meli
e non pì morti di li massari api;
li cosi d’ora  sunnu tutti avvilinati
e chiddu ca mangiamu nun si sapi.
 
`Ncampagna c’era lu travagghiu:
cu a zappari o a scippari erba;
c’eranu tutti, patri e figghi
livatisi la matina all’arba.

Pi’ l’aria si sintianu sunuri ragghi
e richiami, tanti, di jumenti,
di crapi e cani a spagghiu
e vuciati e vrami a lu vientu.

Un cantu si livava, di sdignu e di disprezzu,
pì la pirsuna sua purmisa a nozzi
ca duoppu  ‘na notti di chiantu e sigghiuzzu:
“ Ia cu tìa…. nu’ mi cci curcu ‘nta lu jazzu!”
                           
‘Nu sbriu di festa e tanta fudda
pì’ li viola e li trazzeri:
uomini a rietina e fimmini a cavaddu,
c’ora staiu sulu a raccuntari.

Muli siddati cu fasci d’erba misi:
longa, fina, tennira e gustusa
a’ la stadda sistimata ‘nta n’agnuni,
pì lu jiornu, di tutti , Santu di dumani.

A vidila di  ‘sti tiempi n’haju pena,  
abbannunata, com’è, a lu so’ distinu
pruni e ruvetta fannu da patruna:
li picciotti cchiù  nun hannu  lena.

Ad atri travagghi, ora, su jittati,
macari fora, sempri scunusciuti,
ca picca e nenti arricampava all’annu
mancu li spisi… di la fatìa e l’affannu!
                           
Chianiati di vigni, ancora da  zzappari,
‘mpistati di paparina ed agroduci gialla,
parìanu pittati cu “ tantu di pinnelli”:
ca matri natura, sulu idda, sapi fari!

Tanti famusi, da sempri cc’hannu pruvatu
a cupiarli a farli uguali, ma s’hannu sbaggliatu
ad ammiscari, russu  virdi giallu, li culura
picchì è segretu…  e tali ava ristari e, nuddu ava  sapiri!   
                
Era tiempu di caccia a li farfalli ‘nta li viola,
faciennu a gara a pigghiarli a volu
pì poi, fari la cunta  e sarbarli a menzu  libri di scola.
Mi pari ca, puru di chistu nu’ si fa cchiù parola

Di  sudda sciuruta tapizzata
comu di veste, ca fussi zzita,
accussì bedda l’avia vuluta
matri natura, d’essiri pittata.

E  ia … sunnavu  ittatu ‘ncapu d’idda…,
taliannu  alluccutu  l’azzolu di lu  cielu
e l’occhi ‘nu stavanu cchiù a vanedda…
a vidiri com’era ddu linzolu !

Un mari mi paria suttancapu
armatu  di gran nuvuli fantasma,
e stavu fermu, cumu fussi un pupu:
a vidiri…chi cosi… di ‘stu cosmu!

 Di picurieddi misi sparpagghiati,
 di pinnillati culurati a comu veni;
…taliavu  e ristavu ‘mpassulutu:
da quannu e d’unni veni… chist’arcanu

N’aceddu camurriusu e pitulanti mi furrìava…
 ora vicinu  e poi s’alluntanava,
 pariva mi vulissi diri, senza tantu velu:
 “ Vidica…, puru ia,  fazzu parti di ‘stu cielu!”

 E tanti rinninedddi cchiù luntanu
 vulavanu… ‘na vota a fari negghia e po’ scappari,
 parìa ca fussiru addicati a circari….:
 nun sacciu cosa, pì jiurnata sana!

E tanti voti, cu lu mè pinsieru eru  accussì luntanu… ,
d’essiri da me’  stissu misu fora…
e mi pirdìa, varcannu, ‘nta  ddu chianu…
da nu’ sintìri vuci  nè   rumura.

Ora… mi manca  ddù cuscinu d’erba,
la fantasia ca mi facìa vulari…
ch’era, tannu,  accuomu  ‘ na frutta acerba…
pì nun aviri tiempu d’aspittari!

 Ora… li piedi tegnu misi ‘n terra…
picchì  nun svulazzìa cchiù  la  menti;
sunnu pisanti, comu di savurra:
lu passu   ‘ncertu … e puru malamenti!  
 
Gioacchino Todaro


Viste 8370 - Commenti 0
Iscriviti
ed inizia a pubblicare i tuoi contributi culturali