Lu miraculu di fra' Binnardu
Mi la cuntà lu su Pippinu Chiazza,
mentri facìamu salottu ni la chiazza,
dintra lu carru supra na visazza,
picchì fora lu friddu 'mpurpittava
- era Frivaru, misi curtu e amaru!.-
sta storia santa di Frati Binnardu,
monacu di cerca e truzzuariu...
Nuddu è profeta ni' la propria terra,
ma fra' Binnardu è omu eccezionali.
E di miraculi ni fa na caterva...
"Si mi cridìti, cari signuri,
avi un piezzu chi vi vuogghìu cuntari
na storia bella di stu me' parenti,
chi nascìu na' lu milli e uottucientu...
Ca me' nannu, a la campìa, mi cuntava..."
"C'era na vota un viecchiu picuraru
c'avìa na' mannira ch'era na biddizza,
tra Turturesi e Terzu di Jusu,
patruni e sociu di la Principissa
di Santa Cruci e di Santu Vicienzu
ca puru ja ci paàva lu 'ncienzu...
Quannu facìa la muta era un priùri
viriri milli piecuri a lu passu,
cu’ deci cratuli, vinti cratulicchi
e na dicina di cani di mannira...
Na brutta annata, duoppu li jlàti,
a li piecuri ci vinni lu chiuvardu,
ca ci 'mpurrianu l'ugna di li pieri...
Chiddu c'un fici lu viecchìu picuraru
pi' fari frunti a dda maledizzioni ...
Appi a sagnari un migghiaru di piecuri
e quattromila pieri appi a ciarmari..."
"Alia, catalia, lu peri t'azzizzu,
bianca malata di la principissa...,
Quattrumila voti ripitutu..."
Ma di guariri nun si ni parrava:
a deci a deci javanu cariennu,
c li carusi. senza capezza,
na' lu menz'jornu e a la scurata,
si li spartìanu jucannu a li ciampi...
E l' arrustìanu cu peddi e curàta...
Fin 'a quannu vinni a la mannira,
propia comu a lu frati manzunianu
ca di li nuci pampini ni fici,
frati Binnardu, monacu nustranu,
di li tiempi di li Promessi Sposi..."
"Fermu, Caloriu, cu' sti saracinati!
Lu Diu Cristianu li piecuri cura:
a una a una, mànnalli fora...
E pua viri ca lu vènniri matinu...
la mannira agghiorna senza chiài,
picchì Cristu lu voli e San Franciscu
e la Madonna di Gibilimanna,
patrona di li àrii e di li màrcati..."
"Armuzzi Santi, pinzàtici Vui
pi' li pieri purriti di sta piecura,
li du' davanti e li du' darrietu
San Franciscu, 'namuratu,
di li biddizzi di lu Criatu,
Maria Santissima di li Grazzi,
cu' li ciauli supra li casi
e li palummi chi fannu ‘ tummi tummi ’...
San’ Antuninu, munachieddu finu,
chi tieni 'n brazza lu Bamninu,
dici la missa senza saristanu;
lu ciervu ti proi l'acqua e lu vinu,
lu cuorvu ti sona li campani..."...
E scuddariannu la cruna di li Santi,
na piecura pigghia e n'autra lassa,
chiù di setticientu ni passaru:
setti pi' quattru vint'uottu... e passa…
Ca misi 'nterra fannu pruvulazzu...
E, insumma, pi' cuntalla propia tutta,
ci fu na litanìa di milli Santi,
picchì setticientu un abbastaru...
Tutt'e milli chiamati in ajutu,
e fra' Binnardu ancora ni sapìa,
puru chiddi ca Pàulu livàu...
E ad ogni Santu ci dicìa la sua...
"Arrivederci, omu senza firi,
lu vènniri matinu, viegnu arrieri…
dillu a la Principissa e a to' mugghieri…
E sempri Gesù Cristu sia lodatu...".
"Attìa Caloriu, mi l' avia scurdatu,
avanzu un guzzunieddu e un canistratu
di li du' piecuri di lu Cummientu...
E 'un smafariari si la sisca è vacanti:
è Gibilimanna chi jnchi e svacanta,
e di Lu Cuozzu fra' Binnardu senti...
Iscriviti
ed inizia a pubblicare i tuoi contributi culturali
DIDACUS
26/03/2009
ALIAEOLIAN ENERGY
DIDACUS
23/04/2014
IS ALIA A DORIC COLONY?
CONCIALDI RINO
26/04/2007
L’OROLOGIO CHE…SFIRRAVA
REPORTER
08/12/2005
IL PROF. FILIPPO GUCCIONE
CONCIALDI RINO
30/08/2008
LA IAIA
DIDACUS
04/01/2010
QUAGGHIATA AT MIDNIGHT…
CONCIALDI RINO
06/02/2007
’A PUTÌA MUNICIPALI
LENA COOK
21/10/2010
CAVATIEDDI E MACCARRÙNA
REPORTER
11/10/2005
LU CUBBAITARU
DIDACUS
31/05/2010
THE ABBA AT ALIA BEFORE “MADONNA”
REPORTER
01/11/2005
NATALI LUNTANI DI L'ULTIMU MILLENNIU
REPORTER
02/12/2005
LE TRADIZIONI - IV^ PARTE –
DIDACUS
24/03/2011
L’AVIRMARIA
REPORTER
11/10/2005
LU URDINARU E LA SO’ RIÉTINA
REPORTER
08/12/2005
JACHINU L‘UORVU
REPORTER
15/01/2008
SIRITINA DI MMIERNU