Pubblica

Voci Siciliane

IT ALIA REDAZIONE IT ALIA REDAZIONE Pubblicato il 13/06/2016
LU DUJ DI LUGLIU

LU DUJ DI LUGLIU

Lu dui di luglio all`Alia è festa granni,

picchi è la festa di la santa Matri

si torna all`Alia di tutti banni,

ccà,ntà terra di li viecchi patri.

Di la Germania,la Francia e l`Inghilterra

tornanu li divoti paesani,

fussi lu munnu `npaci o fussi `nguerra

tornanu di li terri cchù luntani.

Tornanu p`abbrazzarisi a la matri

chi l`addivau sutta la fatedda

e pi prigari la matri di Diu Patri,

Madonna di li grazi benedetta.

A lu Cravaniu,com`è tradizioni,

si fa sempri la fera di l`armali,

muli cavaddi e vacchi a profussioni,

spittaculu accussi nunn`avi aguali.

Dda,nta la santa casa,a la Matrici,

missa cantata,ncienzu e campampaniati,

La Vergini Maria benefattrici,

nn`abbrazza nni pirtuna li piccati.

Splinnuri d`oru e ninfi di cristallu

e n`prima fila c`è l`autorità,

fimmini e spaddi nuri,senza sciallu,

fannu gran mustra di mudernità.

Parati a festa sunnu li parrini,

riccu l`artaru d`oru priziusu,

canta lu coru di li circulini

cu l`organu chi sona maistusu.

C`è sempri,a la finitura di la missa,

na guardia di picciuotti fricaluori,

cu l`uocchiu muortu e la facci di fissa

`cerca di donni bieddi e senza cori.

Quannu nesci la santa prucissioni,

quasi a migghiara e tutti a pieri ,nterra,

mantiniemu li nostri purmisioni

a la gran matri di la nostra terra.

Chini li strati sù di luminari,

suonu di banna e sparu di mascuna,

li fimmini s`addicanu a mustrari

li miegghi cutri `nta li finistruna.

La sira jamu tutti `nta la chiazza

pimusica e canzuni e puisia 

cu `ncontra amici li vasa e l`abbrazza,

cu amici unn`avi di latu si canzia.

Tuttu finisci `nta li matinati

quannu attacca a calari la muddura,

l`uocchi su stanchi e li jammi tagghiati

mentri canta la cucca `nta Raciura.

Tutti a li casi e la menti a maria 

ca d`ogni mali n`av`a liberari,

nn`av`a sarvari di la morti ria

paci e saluti a tutti nn`av`a dari.

                                                     Cirinè

Alia - Viste 2126 - Commenti 0
Iscriviti
ed inizia a pubblicare i tuoi post