PRESEPIU DI NATALI
Vacanti è lu Presepiu di la Sicilia .
Si piersiru li valura di la famigghia .
Mancanu li pastura : su emigrati ,
vieni Gesù miu , aiuta sti tò figghi .
A sta matri ca si mungi sempri latti
E pani a li pastura nun po’ dari ;
talia lu Presepiu sbacantatu
e sbutta ‘chiantu lu jornu di Natali .
Poviri pasturedda sfurtunati ,
su tutti sparpagghiati pi lu munnu ,
hannu lu cori afflittu di duluri
e cantanu nenii tristi e amari .
Nun sunnu nuveni duci e natalizi ,
ma chianti d’ emigranti , di pasturi ;
ca scinni a sciumi ‘ntà la nostra Terra
comu tonfu d’ un granni turrenti .
Lu chiantu si perdi ‘ntà li vadduna
Comu lu suonu di li zampugnara ,
vieni Signuri miu , dunami nà manu
e jinchi stu Presepiu sicilianu .
Iunci stu gran regnu a li famigghi ,
portami , sti pastura sfurtunati ,
Nna stu Presepiu miettici a me figghiu
Ca jinchi la me casa lu jornu di Natali .
Anonimo
dalla raccolta di poesie di Franca Di pasquale
Inviacele al seguente indirizzo di posta elettronica : assarca2001@gmail.com
