NUN C’E’ CASA SENZA CRUCI
Nun c’è casa né famigghia senza guai né lamienti,
unni c’è malata la figghia, c’è cu campa a via di stienti!
Unni c’è lu scimunitu, unni la matri orva a l’agnuni,
c’è cu avi lu maritu, suspittusu e lampiuni!
C’è cu soffri fami e friddu, c’è cu grida pi duluri,
cu è malatu di murbiddu, cu d’eternu raffridduri!
C’è lu riccu scunsulatu, c’è lu sanu puvurieddu,
c’è lu bruttu, lu sfurtunatu lu malatu di cirivieddu!
Pi cunchiudiri vi dicu, affirmannu a tutta vuci,
comu dici un muttu anticu: “ Nun c’è casa senza Cruci! “ .
Nino Testa “ Spiculiannu a Cefalu’ “
L. Misuraca Editore
Da una raccolta di poesie siciliane di Franca Di Pasquale
Inviacele al seguente indirizzo di posta elettronica : assarca2001@gmail.com
